منتدى الفرح المسيحى - الرب بيقول قد أمرت

https://upload.chjoy.com/uploads/171161833153651.jpg

كتير العالم بيصدرنا فكرة أن اللي متحكم في حياتنا
أو مستقبلنا حاجة أو حد!
تخيل مثلًا مدى توترنا بسبب موضوع الدولار
وارتفاع الأسعار الوقت ده! مش باقول أنه مش حقيقي
وبنكره. هي بالفعل حاجة وحشة جدًا!
وده بالظبط مثلًا اللي حصل مع إيليا. لما حصل الجفاف.
حصل مجاعة. حصل قحط! يعني حاجة وحشة جدًا!
لكن....
الرب قال لإيليا أنا عايزك تروح عند النهر الفلاني
وأنا هناك هاخد بالي منك. قال الرب كده بالحرف:
"وقَدْ أمَرتُ الغِربانَ أنْ تعولكَ هناك".
أنتوا متخيليين الكلمة يا جماعة.
إحنا بنسمعها دلوقتي عادي لأننا عارفين القصة!
واتعودنا عليها من وإحنا صغيرين.
عايزك تتخيل الكلمات دي على مسامع إيليا لأول مرة!
كان في أمر طلع من عند الرب! أيا كان رايح لمين هيتنفذ
وهيتحقق بغض النظر عن الظروف
. هو يأمر بأمر فيتنفذ عشان خاطر ابنه.
بعدها بشهور يقول الرب لإيليا يروح مكان تاني عشان النهر نشف!
ويقوله تاني بالحرف كده: "
هوذا قد أمَرتُ هناكَ امرأةً أرمَلَةً أنْ تعولكَ".
أمر جديد يديه الرب عشان خاطر ابنه!
مش مهم الطريقة؛ ماتهمكش!
مش مهم الوسيلة؛ ماتخصكش!
المهم حاجة واحدة أنه وحده اللي بيأمر.
وحده المتحكم! ولما يأمر ماحدش يقف قدام أمره!
بغض النظر عن الظرف. بغض النظر عن الضيق اللي موجود.
بغض النظر عن الضيق اللي جاي. الرب بيقول: "قد أمرت"