منتدى الفرح المسيحى - صليّ لي يا ماما عند قلبه النهاردة

https://upload.chjoy.com/uploads/171088470651821.jpg

لسة فاكرة كل لمسة، طبطبة، شخطة،
تكشيرة وش وقفلة عين لما يكون عندنا ضيوف عشان
أفهم قصدها من غير ما يحسوا ..

لسة فاكرة وقفتها في الشباك لما أنزل،
و كل ليلة امتحان جت تشقر عليّ، لهفتها
وهي بتشب تعرف من عينيّ عملت إيه وأنا خارجة من اللجنة
قبل ما أوصل عندها وأتكلم ..

فاكرة دموعك وقت فرحتي، وسامعة صوت الزغاريد 💔

لسة فاكرة وقفة المطبخ والرغي بالساعات
، ووصفها للدكتور لحالتي وأنا حاسة بإيه في تعبي كأنها أنا،
ومكالمة خالتو تشتكي لها مني وتدعي عليّ من غُلبها
بس تكره لو خالتو قالت أمين ..

فاكرة كل مرة حاولت أخبي وأضحك في وشك
بس قفشتيني وقولتلي " مالك، حصل إيه وإيه اللي مضايقك؟"

مابنساش يارب و لا الوقت بينسيني ثانية
، واليوم ده بيوجع في قلبي كل سنة من وقت فراقها عني .. 😭

لسه معايّ في كل خطوة يا " ماما " ❤️
مابتغبيش 💔

أنا عارفة يارب إنك قريب وسامع، أصله مكتوب عنك
"فِي كُلِّ ضِيقِهِمْ تَضَايَقَ،…….." (إش ٦٣: ٩)
صليّ لي يا ماما عند قلبه النهاردة ، اللي مكتوب عنه أنه :
"أَبُو الرَّأْفَةِ وَإِلهُ كُلِّ تَعْزِيَةٍ،" (٢كو ١: ٣)
عيد_الأم