منتدى الفرح المسيحى - الراضي المتراضى

https://upload.chjoy.com/uploads/167612463671951.jpg

الراضي المتراضى.

راضى ده مش اسمه، ده وصفه، دي حالته ..
ده واحد (او واحدة) راضي قوي ، "السوفت وير" بتاعه كده ،
مبسوط مع كل موقف و شاكر علي كل الأحوال..

من كتر رضاه يشوف كل موقف مهما كان فيه امل..

لو الأسانسير عطل ، يقول الحمد لله ان السلالم بخير
و ان احنا مش ساكنين فى آخر دور !!
و لو حتي ساكنين فى آخر دور يقول الحمد لله ان لينا شقة
و ساترانا، ده غيرنا ما لوش سكن أصلا..

لو الفلوس قلت يقول : رضا، قلت بس ما خلصتش
، و تكفينا بالبركة و الستر ..
لو تعب يقول : تجربة من يد الله و وراها خير ..

كل موقف يشوفه جميل !!

من كتر رضاه تحس ان ما لوش طموح !!
طموحه هادى و بسيط و جميل ..
و برضه من كتر حلاوة قلبه الطموح نفسه يجرى عليه
و النجاح ييجي لحد عنده !!

و لأنه شاكر علي طول رزقه فى رجليه ، و حب الناس لشخصيته
"السكرة" فوق الوصف ..

الراضي متهني و يهني كل اللي حواليه..
من قلة طلباته الناس تتمني له الخير و تديله من غير حساب ..

الراضي المتراضى يهنى شريك حياته و اولاده و اصحابه؛
كلامه و قعدته و أعماله شهد بينقط فرح ..

اطلب من الله يديك الروح الجميلة دي ،
تسعد بيها ايامك و أيام كل اللي حواليك ..