[Mary Naeem]

خبرية روحية:
بيخبروا انو كان في مرة زيز بحب كتير انو يطير ولكن كان عندو مشكلة وحدة: كان ناصح كتير. ونصاحتو هيدي عم تتعبو بعد كم دقيقة من الطيران. راح استشار صاحبو يلي نصحو انو يعمل رجيم قاسي! بس صاحبنا ما ضاين يومين حتى رجع ياكل أكتر من قبل ولكن رغبتو بالطيران خلتو يرجع يفكر شو ممكن يعمل، فقرر انو ينقّص وزنو بأبسط طريقة ممكنة وهي انو يكب عنو كل شيء تقيل ويقبع من جسمو كل وزن زايد وهيك بيضعف وبيصير خفيف تيطير بالعالي.

وكان انو صاحبنا حاول يقبع اجرو بس قبع اجرو بوجعو. حاول ايدو ولكن ايدو وجعتو. ما بقالو إلا انو يقطش شوي من جوانحو. وجرّب ولكن ما تغير شيء ابداً. معقولي، رح أقطش بعد شوي وبعد شوي وبعد شوي، وحاول صاحبنا يطير لكن كانوا طاروا كل جوانحوا.
اخوتي الاحباء نحنا هيك، بعلاقتنا مع الله حابين نوصل لعندو باسرع وقت وبدنا نوصل للكهنوت بأسرع طريقة، ولكن على قد ما همومنا كتار واشغالنا بتاخد كل وقتنا منصير نقطش عن الصلاة عن قراءة الانجيل والتأمل فيه وعن القداس… وبنقول بسيطة كلها مرة. حتى نوصل لوقت طارت الجوانح لبدها توصلنا على السماء. بالبداية بنكون منخاف من الله وبعد فترة قليلة بصير الله يخاف منا.