معجزة نادرة للشهيد ابو سفين اقامة ميت
الأستاذ مجدى زكى جرجس بيشتغل مراقب فى الصرف الصحى والمدام تريزة نجيب ابراهيم بتشتغل مراقبة حسابات فى وزارة المالية وساكنين فى مدينة الشروق عندهم ولدين مينا عندة 16 سنة فى اولى ثانوى والصغير اسمة تونى .
مينا كان مربى كلبين فوق السطوح فى سابع دور وهما كانواساكنين فى الدور الثالث مينا حمى الكلبين وقعد يلعب معاهم ، مينا سمع صوت زميل له اسمة احمد بينادى علية من الشارع والسطوح كان ليس له سور مينا ركع على ركبة ووطى راسة علشان يبص على زميلة فداخ ووقع من الدور السابع وهو واقع فى الهواء حس كانة بيضرب فى خلاط وبعدين مدريش بنفسة . جيرانهم الاستاذ ايميل ميلاد ومدام نجوى وديع سمعوا خبط شديد على باب شقتهم اتصلوا بسرعة بالاسعاف علشان يلحقوا مينا . مدام نجوى كلمت الاسعاف وبعد كدة نزلت الشارع على طول لقت مينا واقع على ظهرة والناس اتلموا حوالية يحركوا فية مافيش اى علامة من علامات الحياة لانفس ولا نبض ولا حركة . مدام نجوى قعدت تصرخ انجدنا يا اله ابوسيفين وطلعت شقتها قدام صورة الشهيد وطلبتة بدموع وايمان ولجاجة وجريت جابت زجاجة زيت صغيرة فيها زيت أقل من نصفها جيباها من الدير لان خالة زوجها راهبة فى دير الشهيد واعطتها لزوجها الاستاذ ايميل و كان واقف بجوارهم الحاج صابر ساكن معاهم فى الدور الرباع وكان متالم جدا وبيقول ولا حول ولا قوة الا بالله مينا خلاص انتهى الاستاذ ايميل مسك زجاجة الزيت وصبها فى يد الحاج صابر علشان يدلك صدر مينا . وتضفك الزيت من الزجاجة بغزارة وفاض الزيت لدرجة انة غرق كم الحاج صابر ودهن بية جسم مينا كلة من راسة لرجلية .
وفى لحظتها شهق مينا شهقة جامدة ودبت فية الحياة فى الحال وحرك رجلة اليمين وكح وحاول يحرك ظهرة علشان يقعد وكل الواقفين فرحوا وقالوا اتكتب له عمر جديد .
الاسعاف وصلت وشالواه على نقالة ونقلوة لمستشفى التامين الصحى بمدينة نصر وعملوا لة اشعة مقطعية على جميع اجزاء جسمة من الراس للقدمين وطلعت كلها سليمة 100% وسط دهشة الجميع عملوا لة سونار على البطن خوفا من ان يكون عندة نزيف داخلى فى الطحال او الكبد طلعت سليمة تماما عملوا له ( ايكو ) فحص للقلب طلع سليم ايضا عملوا له اشعات اكس راى واشعات فوق صوتية طلعت كلها كويسة وكانت الحرارة والضغط والنبض كلهم طبيعين وسمعت زوجة خالة دكتورة ميرفت بالحادث وراحت بسرعة على المستشفى وشافت كل الفحوصات والاشعات اللى عملوها لمينا لقتها كلها سليمة واجمع كل الاطباء ان دى معجزة 100% وان مينا انقذ من موت محقق وبالاجمال كان تقرير المستشفى ان حالتة جيدة تماما ولا يوجد شىء غير طبيعى .
ساعة وقوع الحادث كانت والدة مينا فى الشغل ولما علمت بالحادث اصابها ذهول وقعدت ثلاث ايام لاتاكل ولا تشرب ولا تنام مدام نجوى جارتها دهنتها بزيت الشهيد ابوسيفين ولبستها صليب جلد من الدير وربنا اتمجد بسلام وقدرت تنام وتاكل . جابوا لمينا من الدير زيت وحنوط ومياه لقان وكانت القربانة اول حاجة ياكلها مينا . الدكتور شريف عزت والدكتور مصطفى اطباء مخ واعصاب تبع المستشفى فحصوا مينا ولقوة سليم تماما وقال الدكتور مصطفى بصراحة دى معجزة ربنا موجود فى بيتكم مينا اتكتبلوا عمر جديد كان المفروض نتيجة لذلك يموت او حتى لو نجى من الموت يحصلوا كسر فى العمود الفقرى او ارتجاج فى المخ لان راسة ارتطمت بالارض بقوة من ارتفاع عالى .
لما روحوا البيت عملوا تمجيد بحرارة للشهيد ابى سيفين وبعد كدة راحوا دير الشهيد ومعاهم التقارير الطبية وسجلوا المعجزة وشكروا القديس على صواتة واحب مينا الشهيد ابى سيفين جدا واتخذة شفيعا لة .
بركة وشفاعة القديس فلتكن معنا جميعا امين
14 - 05 - 2021, 08:52 PM
قد تكون مهتم بالمواضيع التالية ايضاً
العرض العادي
