عارفين مرة الانبا انطونيوس صحى كده من النوم و طلع من مغارته فوق الجبل الصبح بدرى ف شاف الشياطين عاملة شباك كده كتير فوق الجبل و فى الصحرا كلها مالية الارض !!!! ف رفع عينه للسما قاله يارب ايه كل ده !! اتصرف ازاى انا دلوقتى !! ف سمع صوت قاله : لو عايز تغلبهم يا انطونيوس خليك متواضع على طول و ده بقى منهجه فى حياته لحد ما اتنيح ..
ف مرة الشياطين كانت بتحاربه ف كان يقولهم انا غلبان و ضعيف .. ده انتم اقوى منى فكانوا يسمعوا كده يتحرقوا على طول و لما كان يطلع الجبل كان يقول مزامير باستمرار ف مرة كان نازل يملى الاناء الفخارى اللى عنده من عين المياه اللى ربنا عملهاله.. ف الشياطين حبت تحاربه ف طلع الجبل لحد اخره و لسه هايدخل المغارة راحت الشياطين وقعت الاناء ده من الجبل نزل لقاه مش مكسور ف ملاه و طلع و حصل نفس الموقف و نزل تانى و ملاه و هكذا .. مع العلم انه كان عنده 105 سنة !!!! نزل و طلع الجبل 5 مرات فى اخر مره سمع الشياطين بتصرخ و تقول : غلبتنا يا انطونيوس ب اتضاعك !!!!!
الانبا انطونيوس العالم كله يدين ليه بالفضل .... من قداسته كان وجه يبقى منور على طول ف كان تلميذه يقعد قدامه كده ساكت ف الانبا انطونيوس يقوله : ما تتكلم يا حبيبى !! يرد تلميذه : يكفينى النظر الى وجهك يا ابى و دى اشهر جملة فى بستان الرهبان ......
مرة كمان زادت الحروب عليه و الشياطين مسكته ضربته و بهدلته !!! لدرجة ان كل حته فيه كانت بتنزف و جرته من فوق الجبل .. مش بس كده دول كمان مسكوا القلنسوة بتاعته اللى لابسها على راسه و قطعوها ( شقوها نصفين ) وظهرله المسيح و شفاه و قاله انا كنت جوه قلبك و بديلك القوة للاحتمال .. علشان كده كل الاباء الرهبان بيلبسوا القلنسوة عليها صلبان و فيها شق فى النص علشان نفتكر القصة دى
الانبا انطونيوس كان صديق البابا اثناسيوس و البابا اثناسيوس استغل الفترة اللى اتنفى فيها و كتب سيرة الانبا انطونيوس للعالم الغربى علشان كده الرهبنة انتشرت فى الغرب بسبب سيرة الانبا انطونيوس اللى اتحفرت جواهم
الانبا انطونيوس حكاياته كتيرة مهما اتكلمت مش هاوفيه حقه
23 - 10 - 2020, 07:39 PM
العرض العادي
